ARIETE  La stimana passà xe sta dura e a ve ga stracà ma a setembre podì metarve in sesto in pressia. Non stè piansare par niente: gavarì tempo anca par trovarve un moroso o na morosa da 'ndare a camperse. Ma el belo el rivarà entro la fine de st'ano. 

TORO Non ste a vedare rosso come vostro solito e farve girare le bale par niente. In sti giorni gavarì voja de metare le robe a posto con qualchedun, ma no ste a incornarlo. Ste chiedi parchè ve rivarà dele sorprese, ma le podaria esare anca fastidiose. Par lo sgonbo e i schei...portè pasiensa 'ncora un poco

GEMELLI Gaví prasente cossa vol dire urlare nele rece de un sordo? Bon, quindi non ste insistere con chi non vole scoltare parché ve podaria vegnere mal de gola e nervoso. In sta stimana ve convien non far massa bagordi: a si indrio de sono e gavì do oci che parè Morgan ala matina. E se gavì rogne in fameja mejo metarsela via in sti jorni

CANCRO A si pieni de sprint come na latina de coca scorlà! Cossa spetè a versarla? Coi altri stimana dove podì tirar fora el mejo de vojaltri. Venere ve agita un poco, ma ve fa anca ciacolare mejo, che iera anca ora!. Neo sgobo tanta sdruma a setembre, come l'istà che xe passà, ma le sodisfazión a le sará tante de più. 

LEONE Stimana da tirar fora le onge par sgranfare. El leon in sti giorni el staria a godarse i ultimi giorni d'istà e invese ghe toca star tento. Chi gà na storia che va vanti masa e male ghe toca sbatarse par parlare e in più ghe xe aria de barufa. I segni coi quali gavì mareta xe Acquario, Cancro, Scorpione e Toro. Lo strologo el vede anca  qualche magagna che xe drio rivare. 

VERGINE Me racomando, a dovì darve da fare come se non ghe fose un diman. Sta stimana le stele le farà capriole all'indrio par vojaltri dea Vergine. Ma basta aver paura dele ombre, piutosto feve un'ombra e tirè fora el corajo.  Par le storie de core, xe el momento giusto: e domenega podarì fare el boto.

BILANCIA Calma, quiete e tegner le fassine al cuerto. Penseghe ben prima de movarve, sopratuto nele storie scominsia ad agosto: dovarì decidere se continuare o assar stare. Par questo non dovì stare sull'albero come cachi fati: decidive parché senó ve toca 'ndare  zó di xanax de bruto. 

SCORPIONE Setembre e otobre ve bate el core e non solo. Da oncó ghe sarà stimane de fogo par novi amori, anca par chi se trova el moroso o la morosa. Venere sta pasando e non podì non sentirlo, ma deve na scorlada. E se el core ve scombate, lo strologo ve dise che anca nel lavoro bone robe e tanta roba. 

SAGITTARIO Rogne in fameja, con el vostro omo o la vostra dona? Sta stimana metivela via e ste col core in pace e pensè a la legge de Murphy. Non ve vojo spaventare e farve 'ndare in para: la passará. Dala stimana che vien e verso la fine de l'ano, la sarà na figada par vojaltri. 

CAPRICORNO Ste tenti a non tiraverla massa parché dopo la ciapé nel dedrio. Quindi se nei mesi passà gavi meso el vestito da sboroni deso doví tirar fora el sajo. E se scominziè a tegnere le féte par tera a-lora podarì ri-scominziare par ben.

ACQUARIO Bea stimana par vojaltri ma si strachi da quea passà. Tenti a non rabiarve massa con el vosto omo o la vostra dona e anca con in fameja, magari par cassade. Ocio anca ai schei: se i xe pochi, ste tenti ae spese che pol capitare tra copa e colo. 

PESCI Na stimana che scominzia da strachi e la dovaria finire ben. Lo strologo el sà che sì un fià sbatù ma le stele le sarà con vojaltri par star mejo. Non ste infasarve la testa: xe drio rivare tempi mejo, sia  par lo sgobo che par li afari de core.