Oroscopo dela stimana dal 31 luglio al 5 agosto
La gavio vista l'eclissi del luna? Anca lo strologo, ma ne ga asicurò che no xe la situasion mejo par vardar le stee. Ad ogni modo, ga tirò fora questo... dopo la partia però
Ariete: Muy bien, tanto noialtri vicentini lo spagnolo lo savemo parchè xe simie al dialeto. Le stee ve vole ben anca sa ve toca star sarà in uficio, figureve sa sì in giro. Quindi, chi che lavora, guadagna, chi che xe in ferie se diverte. Anca massa!
Leone: Moeghea de eser sempre el segno dela stimana, ca mi me stufo! Le robe le continua ad andar bene e, anca sa gavì na crinierà spenocià o onta, a fasì suceso isteso. I misteri dee stee.
Sagittario: alora, disemo ca le robe le via mia benissimo ma voialtri sì drio afrontar le robe con queo ca ghe voe: ottimismo e incosiensa! No, si mia mati ma zerte volte par star sani bisogna anca eser un poco semi. E a voialtri ve vien ben, disemo.
Toro: Disemo che, anca se non si seducenti come un figon, fasì la vostra porca figura. I morosi e i amici ve voe ben par quelo ca sì, quindi godive sta bea stimana.
Vergine: Ocio, ocio, ocio ca ghe xe qualchedun ca xe n'atimin invidioso e ve rompe i cojoni a manetta. Deme reta, asè perdare ca poi tanto i se stufa. Pitosto compreve un costumin e pensè ale vacanse, magari romantiche. No, xe mia na bestema, anca voialtri podì farlo.
Capricorno: Va bhe, lo savì, xe mia un bell'anno sto qua e ciapar tuti a scornà no iuta. Ste calmi. Consoleve coi morosi e, se sì single, zerchè qualchedun. Ma tirè fora un sorisetto ogni tanto.
Gemelli: Stimana ca parte cusì cusì ma che andarà altro che a migliorare. Coi amici ve divertì ma ocio ca podaria palesarse l'ex. Decidì voialtri cosa fare: a volta la supa riscaldà podaria anca eser bon ma savì cosa ve speta...
Bilancia: La sarà na stimana duretta, almanco fino al weekend. Tignì bota e zerchè de fare meno dani posibile. De bon ghe xe che i amici ve iuta.
Acquario: Marria santa a sì pì fora de un pergolo. Chi che ga da soportarve xe drio pensare de ciamar la neuro e farve far le ferie in psichiatrico. Dai, ste chieti.
Cancro: La sarà na stimana bona par el lavoro. Se sì in ferie... o tornè al sgobo o ceste. Ghe xe anca da dire ca se si drio zercar morosi, podarisi anca "pissigar" qualche bea robetta. Fasime saver.
Scorpione: Eh se finie e vache grase, ca no le genra gnanca tanto grase, ma no xe el vostro periodo e metivea via. Sta stimana dovarì far tuto da soli e no ste trovar scuse!
Pesci: Ah benon. Gavì tantissssssime robe da fare ma voialtri sì drio noar veloci verso le vacanse. A sì organisà e determinà e parfin coi morosi la va ben. Dai, vanti.