Oroscopo vicentino fino ala Befana
El tempo de riprenderse dal veglion e xe rivà el primo oroscopo del 2017. Non ghe xe garansie, parò, che lo stologo el fusse in sé
Eco el primo oroscopo de l'anno, anca se el strologo ga fato talmente tanti bagordi al Veglion ca no savemo quanto ca el sarà atendibie... Se voli savere anca le prevision par el 2017, podi legerle qua
Par el resto ndè pure vanti e scorpì quale ca xe el segno dela stimana...
Ariete: La sarà na bea stimana. La befana ve portarà serenità e tanti bei sorisi con la fameja e i amici. I single podari avere qualca posibilità e le coppie le gavarà momenti romantici. Solo na roba: se qualchedun voe farvi girar le bae, voialtri girè i tacchi.
Leone: Ocio parchè, sta stimana, le stee prevede par voialtri na figura de merda memorabile. Quindi ste tenti a quel ca fasì e disì e, se no si boni de controlarve, meglio sararse su in casa a vardar la tv. Anca coi morosi ste tenti, parchè el rischio de fare na grossa cassada el xe drio l'angolo.
Sagittario: Fideve del vostro intuito e fasì queo ca gavì in testa, anca se qualchedun ve dise de no. Le stee dise ca xe la decision giusta (ma dopo no ste ciarvela con mi se no la xe). Sarà na bea stimana par lavoro e anca par el sciopping: boni afari in vista.
Toro: Ben dai, no podì mia lamentarve ma a voialtri no ve sta mai ben ninte e xe la roba mijore par essar zo... No ghe xe motivo! Zerchè de goderve le ultime feste ma mejo dedicarsa ai amici che ai morosi. Con quei xe mejo procedere con prudensa.
Vergine: Sta stimana a sì ancora pervasi de spirito natalissio e a sarì bonissimi con tuti, con particolare atension a chi savì voialtri. Zerchè de goderve i ultimi giorni de festa sopratuto con chi ve voe ben: quando ricominsia el sgobo voilatri sì sempre distanti!
Capricorno: Questo xe el vostro periodo, se sà, e ve toca anca soridere parchè no podì far de manco! Godive gli ultimi giorni de festa, magari anca el compleano, e ste coi amici, visto ca sto giro a sì soportabili. Molto bene anca coi morosi o con le conquiste. CIN!!!
Gemelli: No xe mia un bel momento. La vostra spensieratezza, la vostra gioia de vivere la xe un atimin ingolfà. "Paura e schei" mai vudi, disemo noialtri, e alora via quel grugno e zerchè de soridare. A breve rivarà na risposta ca zeri drio spetare e el weekend sarà beo.
Bilancia: A-E-I-O-U... Ipsilon! El capodano xe finio da un toco ma voialtri a sì ancora in piena festa! Ben, e alora divertive, anca coi morosi. A sarì un fiatin nervosetti in tel weekend e la roba mejo saria tasere, no gavì sempre ragion voialtri!
Acquario: El sarà n'inisio de stimana un fiatin tribilà, ma, col pasar dei giorni, le robe le 'ndarà mejo. Quindi no ste far casini inutii e spetè parchè poi ve tornarà el soriso, anca grassie ala famejia e agli amici. A sì pieni de inviti ma no sotovalutè un incontro imprevisto...
Cancro: A sì in grossa forma, ciò... anca un po' grassa, dopo i bagordi. Ma questo no el intaca el vostro buon umore e questo va ben par fare nove amicissie e far feston con quee vecie. L'inissio nol sarà mia beissimo ma fideve de mi.
Scorpione: A ze la stimana giusta par farse qualche gita, magari in montagna, senza esagerare coi brulè, ca poi ve fasì mae. Tante bee sorprese par la Befana, ma ste tenti a quelche decision ca tolì: no xe mia el momento giusto. Se podì, rimandè.
Pesci: A gavì i ocieti a cuoricino, come Candy Candy, al manco in tea prima parte de la stimana. Se sì single, no ste perdar tempo, dove mirè, affondè. Quindì metive sù i guanti ca ve ga regalà la mama e ndè fora a far conquiste. Se gavì morosi, sareve in casa...