Oroscopo vicentino dela stimana dal 20 al 27 marso
Col bloco del trafico el strologo xe rimasto in città, dove no xe ca se vede tanto ben le stee, ma el ga lavorà istesso
"Fine marzo, primo de april, ancora el fredo pol vegnir".
Bisogna star tenti de questa stagion: se se va in giro massa nudi se pol ciaparse su qualcosa... Ma questo xe n'altro discorso. Eco cosa ca dise i astri
Ariete: Se non usè il lanciafiamme par impisarve na cica va tuto ben. Voialtri tendì sempre ad esagerare, quando ca sì in forma ma ste tenti ca nel far la rivolusion no ve trovè sensa i calsiti de ricambio parchè ghe butà via anca quei. Zobia e venare podarisi aver qualche pensiero: dai, che dopo riva el uikend.
Leone: No sì al top, come la stimana scorsa, ma sì comunque frissanti come un bel prosecchin. Godivea e no ste romper massa i maroni co le question de coppia: magari xe ora de darve na petenada ala criniera e de andar altrove.
Sagittario: Ostriche e champagne par voialtri sta stimana. Mejo de cussì no pol 'ndarve e gavì anca conossudo qualchedun ca ve piase. Deghe dentro
Toro: No ghe semo. El lavoro ve fa tribolare e gavì sa speso la paga de aprie, diventè da meno generosi coi giri al bar, almanco finché e robe no e se giusta. Almanco cucchè come un tronista, ma no domenega, quindì podì tornare a bevare coi amici.
Vergine: A ve rovinè le giornate a forsa de pensare ai schei. Dè reta, no xe il momento, gavì da aspetar la fine de aprie. Quindi metivea via e godive qualche spriss. In ammor ghe xe qualche gratacapo ma no ste andar in depresion.
Capricorno: Orco can, zà sì pessimisti de vostro e le stee de sicuro no ve iuta, parchè le robe le mijorerà solo dopo l'istà (no ste ciparvea co' mi). A sì anca fortunà che qualcun ve soporta: godiveo e deghe dentro col lavoro, no coi goti.
Gemelli: Ah benon, par voialtri sta stimana no ghe xe storie: tuto ve va ben e podì far crepar de invidia coleghi e single. Voialtri, infatti, sarì sempre in bona compagnia. Ciapeghe dentro e, se gavì qualche rognetta da risolvere, fasilo deso.
Bilancia: Basta rimugiar! Queo che gavì fato xe sta giusto, anca se gavì usà la grassia de un panson imbriago, e desso dovì aspetar che le robe le se evolva. Tignì la testa alta: equilibrà come ca sì xe il momento de decider voialtri se ordinar un rosso o un bianco. Anca el rosè va ben.
Acquario: A sì incasinà pegio del me armaro, dove no se trova ninte e queo ca se trova xe da stirar. La colpa la xe vostra, sì massa imboresà e non ve acorsì ca fe star mae chi ve se visin. Ocio a non becarve no stramuson
Cancro: No ghe semo, prepareve. Dovì portar pasiensa in sta stimana e no deprimarve, che le stee ve ga preparà un bel 2015, ma no par sti giorni. Coi morosi, invese, la va ben. Consoleve con queo.
Scorpione: Cerchè la colla e scominsiè a riatacarve i tocheti. Xe sta duretta e, se non ve svejè fora, podaria 'ndar anca peso. Deve na mossa e ocio a no incolarve i dei.
Pesci: Pì che dei pessi parì orche assasine: deve na calmada parchè sì drio fare un casin ca metà basta. Se gavì debiti al bar, pagheli, se no i ve vien a sercare col forcon
Ariete:
Toro:
Gemelli:
Cancro:
Leone:
Vergine:
Bilancia:
Scorpione:
Sagittario:
Capricorno:
Acquario:
Pesci: