Oroscopo vicentino dal 20 al 26 febraro
Noti limpide bone par vardar le stee: lo strologo xe gà coerto ben, gà portà drio a so fiaschetta e sta volta (el dise lù) el se ga meso seriamente...
"Primavera de febraro non inpinissi el granaro" i diseva i nostri veci. Sto mese no se capisse mia ben, parchè giorno magari se sta ben ma de note el giassa... Va ben, se no sì contadino no xe ca ve dovì preocupare pì de tanto... Vedemo, invesse, cosa ca dise le stee.
Ariete: sarì astuti e lucidi (se no bevì massa). GHe sarà bone oportunità in tel sgobo e podarì anca farve novi amici. No ste desmentegarve dei morosi, perchè xe previsti bei exploit (xe lese "expluà") tra i linsoi.
Leone: Nervosetti ah?! Aver a che fare con voialtri sta stimana no xe mia salutare, quindi, se no volì far dani, sareve sù da qualche parte. E mejo xe parchè va mae in tuti i cantoni, dal sgobo ai morosi, ai amici. dasime reta: sparì pa un poco...
Sagittario: Ste chieti, par carità, ca se no fasì dani ca metà basta. Se ve comportè ben la stimana no la sarà mia mae: al sgobo xe previste bee sodisfasion e anca coi morosi la va ben e i single podarà divertirse. Quindi, no isterie!
Toro: Xe el momento de goderse un poca de stabilità, ma ocio a non farve incantare da proposte massa bee: la fregadura xe drio l'angolo. Par le coppie va mia massa ben, ghe xe baruffe in vista, ma i single i farà s-ciantisi coe nove conquiste. Deve da fare.
Vergine: Oviamente el lavoro el va ala grande, del resto voialtri sì sempre i secioni. Sta stimana podarisi anca incontrare qualchedun de importante: vestive ben. Par quei ca xe strachi del solito tran tran de copia, podaria esere el momento giusto
Capricorno: Hm, xe ora de comprarse qualcoseta de novo, ca girè coe robe coi busi, n'altro poco. A sì sempre drio lavorare e ve cure poco: se vede! Ciapeve do ore de ferie e ndè a far shopping, par carità. Anca parchè el weekend sarà focoso...
Gemelli: A sarì frizzanti come un proseco de quei boni, sia in tel sgobo che in tee relasion. Quei impegnà i ga da star tenti parchè le tentasion xe tante ma qualchedun podaria far la spia se si massa birichini. In tel weekend podaria concertizzarse qualche obietivo...
Bilancia: A sì gritosi e determinadi ca metà basta, sopratuto al sgobo. Ciapeghe dentro parchè le robe podaria andar anca mejo del mejo. Ben anca coi morosi e ci amici a sì sereni. Godive el tempo libero, ca negavì poco.
Acquario: Bei, fortunà e creativi. La sarà la stimana ideale par voialtri, cari. Quindi deve na sistemada e 'ndè fora, ca le stee ga un saco de robe beissime in serbo par voialtri. CIN!
Cancro: La sarà na stimana al top in tel sgobo. Ispirè fiducia, come un Amarone de quei boni, e a sarì in cima ala lista dei preferii dei capi: podaria rivare qualche proposta interesante. Ben coi morosi e ben anca i single, ca gavarà pì del qualche ocasion
Scorpione: Se sì' dirio zerca lavoro la zè la stimana giusta: ghe xe na persona importante da incontrare e podarisi presetnarghe i bei progeti ca sì drio preparare da tempo. No ste sbajare. Asè stare gli invidiosi e i lamentosi e tirè vanti.
Pesci: Vardeve le spale, ca non gavì mia massa amici intorno e ghe xe anca un poca de sfiga. Capita, no panico. Ste chieti e zerchè de far le robe modeo base, magari la va anca drita. E anca tra i linsoi... mejo dormire.