Oroscopo vicentino dal 16 al 22 jenaro
Co' ste gelate, lo strologo no se ga mià onsà de ndar massa in volta ma xe 'nda i amici sui a far festa in tea so caneva. Eco cosa chel ga scrito, se ve fidè...
"Fredo secco de zenaro, sachi pieni nel granaro. Ma non dargheo ai parenti, nè ai ministri competenti". Quanta verità in tei proverbi de la nostra tradision... chisà se ghi ne xe altretanta ne l'oroscopo!
Par el resto ndè pure vanti e scorpì quale ca xe el segno dela stimana...
Ariete: La sarà na stimana bona, sia al sgobo che con fameja e amici. L'unica roba ca no la va mia ben xe i schei, parchè gavarì qualche spesetta ma el conto in banca el pianse. Zerchè de star chieti e de no rabiarve massa, se no le robe le va ancora pegio. In compenso tra i lensoi fasì s-ciantisi: ocio al pigiama in pile. S
Leone: Bene in tel lavoro e in tee le publiche relasion: ciapeghe dentro ca el conto in banca ghi n'ha bisogno. L'inissio dela stimana el sarà dureto ma tignì bota ca poi le robe le xe indrissa. Se gavì i morosi novi, xe el momento de scoccar la freccia: un bel regaleto o na ceneta romantica e...
Sagittario: La sarà na stimana de sucessi, in tel sgobo, in teo studio in tel torneo de briscola al bar. Se zerchè lavoro, podaria eser la stimana giusta e anca coi morosi a fasì s-ciantisi. Ocio ai giorni in meso ala stimana, parchè ghe sarà qualche rogna da sbrigare
Toro: A sì sta polemici ca metà basta ma saria mejo se ve stuè zò n'atimin parchè se 'ndè vanti così ve manda tuti in mona, morosi compresi. Par fortuna al sgobo la va ben e rivarà na risposta ca spetà da un boto de tempo.
Vergine: A sì massa timidi, a parì trasparenti: se no ve fasì avanti, la persona ca ve piase no se ne acorgerà mai! Le stee dis ca xe el momento giusto. Compreve le mutande nove e deghe dentro. In tel sgobo, come sempre, a sì bravissimi.
Capricorno: Xe la stimana dele svolte, ca xe na roba bona, no ste preocuparve, granitici come ca sì! In tel sgobo primegiè e riva anca na notissia ca spetavi da tempo. Grinta e determinasion, come sempre, no ve manca, e sto giro a fasì anca conquiste. Xe proprio el periodo vostro... CIN!
Gemelli: La sarà na stimana bona e gavarì un saco de bee ocasion, anca economiche: ciapeghe dentro. Fasì conquiste che gnanca Andrea Cocco quando che iera a Vicensa e sta roba no la piase mia ai morosi... mejo se stasì tenti e fasive perdonare come savì voialtri.
Bilancia: Mejo se ve tolì un fiatin de ferie parchè se 'ndè vanti cusì ve rovinè la reputasion e anca el conto in banca. No ve ne va una giusta. Da metà stimana, se ghe rivè, la 'ndarà mejo e l'amor ve soride, ca xe un motivo in più par star casa
Acquario: Ocio a non scabiar fischi par fiaschi: qualcosa podaria sembrarve semplice ma in realtà nasconde na trapoa. Ste tenti a chi frequentè e no fidarve mai massa. Verso metà stimana rivarà bone notissie ca ve darà energia da vendare.
Cancro: Sta stimana quelo ca volì, fasì e ve riesse tuto ben. Zerchè de profitarghine e de no dedicarve ale monade ma ale robe serie. Ghe sarà qualche barufeta in fameja e dovarì sforsarve de eser pì diplomatici. Ocio ala influenza e ai rafredori.
Scorpione: Sto giro le stee le xe daa vostra parte: muy bien! In tel sgobo ve rivarà na risposta ca spetè da tempo ma ocio ai mali de stagion: coversive bene prima de 'ndar fora! Con chea persona proprio no la va: cerchè de manigner la calma. Benissimo coi morosi e amanti.
Pesci: A sì in piena burasca. barufe con tuti e risultati ca no i riva. La roba mejo xe star chieti e zercar de no far casìn ancora de pì. El fine stimana l'andarà un fiatin mejo, sopratuto coi morosi e con nove conquiste.