Oroscopo della settimana dal 10 al 16 luglio
Coi caldi di sti giorni lo strologo ga patio, parchè xe afa anche de note, ma l'oroscopo lo ga mandà istesso
Ariete: Partemo subito disendo ca la xe mia la stimana vostra, ma proprio par ninte. Le robe le va storte sia in tel sgobo ca in fameja e anca co i amici. Evitè, quindi, de andare ai party o ris-cè de far la figura del macaco. Sareve in casa, impisè la tv e ocio ad aver almanco qualche bireta in frigo
Leone: A sì i soliti disastrà. Se ve dive peri, voialtri capì pumi e al sgobo el boss ga serie intension de coparve. Mejo se tolì ferie e ve dedichè ai morosi, ca con quei si ca ve va ben
Sagittario: Gavì presente quel probelma ca ve tormenta da giorni? Eco, no poso mia risolvervevelo mi e gnanca quei santi ca ve soporta in tea vita. Deve na smossa e zerchè de far qualcosetta de vostra inisiativa. Se riusì a no copar nisun fino a venare, poi podì tirar fora costume e savatte e andar a far festa in pissina...
Toro: Fora xe 40°, a casa vostra sarà -10... Disemo ca non xe un periodo in cui a sì molto portà a caicolare con chi ve sta visin. In compenso ve va ben coi schei, se gavì un coloquio de lavoro, andeghe e sfoderè el vostro fassino. Sta stimana podarisi anca vendare na majeta usà de Tutino a un turista de pasagio...
Vergine: Sta stimana visì l'oscar dela prefesion e ve consijo de aprofitare del momento par tentar de ragiunger quel obietivo ca sì drio puntare da massa tempo. In sti giorni podaria eser vostro. Ocio a non far massa tardi la sera, se no poi la matina a sii imbatonii e no ve vien bene ninte.
Capricorno: No so pì cosa dirve, no xe proprio periodo. Tute le vostre doti, grinta, inteligensa e perseveransa, le xe andà in ciupese in sto periodo. Ghe xe anca da dire ca la sfiga ve xe tacà dosso come na patina de sudore. Asse perdare e portè pasiensa.
Gemelli: Sta stimana gavarì qualche sodisfasion in tel lavoro e la roba pì bea xe che questo ve farà salire de gardo in te la stima (basisima) dele persone ca ve sta intorno. Se gavì il moroso, le robe podaria consilidarse (ocio), se sì single, fasive dele domande e deve dele risposte.
Bilancia: A sii imbatonii ca gnanca un gato quando ca fa caldo, lassè perdare robe di lavoro e no ste discuter co nisun, parchè, con ogni probabilità, non solo gavì torto ma sii drio parlare con la persona sbajà. In compenso, in tel fine stimana, podarisi aver qualche sodisfasion amorosa...
Acquario: Sarà na stimana abastansa bona, trane el luni ca podaria portar qualche rognetta. Pal resto va tuto ben, sia in tel sgobo che in tee le relasioni personai. Unica roba: le stee sugerise de curarve de pì... No vojo savere a cosa le se riferisse...
Cancro: Petineve ben e laveve, ca xe anca caldo: sta stimana a sì brilanti come un gin tonic e tuto ve xe a portata de mano. La roba mejo saria far la valigia e andare a far feston parchè se dovì lavorare poi la gente xe invidiosa. Ma podì sempre mandarla in ciupese. Cin!
Scorpione: Dai, ca la gavì quasi fata. Se non perdì concentrasion e se no ve vien un isolasion, xe il momento giusto par arivare al traguardo ca gavì inseguio par tanto tempo. L'unica roba xe ca sì massa brilanti e ris-cè de esar n'atimin pesanti: fasì sport (ma no quando ca xe 40°)
Pesci: E bravi i me pesetti! Sto giro ve va tuto talmente tanto ben in tel lavoro ca ve desmenteghè parfin de far festa. Del resto, gavì sa da, tra mojiti e festoni. Bene, quindi, ca ve contrè in tel sgobo, parchè ve speta boni risultati. Poi pagarè da bevare.