Oroscopo della settimana dal 18 al 24 settembre
Stavolta el Lane nol zugava e lo stologo ga avudo tuto el tempo par concentrarse... eco cosa ca xe vignù fora
Ariete: Se scominsia mia masa ben, cari, ma da marti in poi le robe le ndarà ala grande, sopratuto in tel fine stimana! Se gavì da sarare acordi de lavoro, xe el momento giusto, quindi porteve sempre un poche de bolicine in tea borsa. Ah, na roba: casa gavio in mente con quea persona ca ve fa i oci da pesse lesso da quel dì?
Leone: Come sempre le robe e va ben e savì na roba? Ve ndarà ben anca pai prosimi do anni, grassie a Saturno. L'unica xe che durante la stimana a sì un po' acidelli coi morosi ma disighe chi staga chieti: in tel fine stimana ve farè perdonare alla gradissima.
Sagittario: A sto giro gavì fassino da vendare. Quindi, tirè fora la camisa bea e metive a far nove conosense, ca ve porterà robe buone. La roba però no piase mia ai morosi e podarisi avere qualche rognetta...
Toro: Se qualchedun ve ga spacà el cuore, xe ora de mandarlo in ciupese. In sta stimana gavarè n'apuntamento galante ca andarà ben, quindi ricordeve de lavarve. Mae par quei ca ga zà el moroso: a sì un fiatin massa musoni. Un consiglio: ndè sfogarve in palestra o feve na corsetta, magari fin al bar.
Vergine: Molto ben, in tel lavoro come sempre e, grande notissia, anca in tel ammor. Oltre ad esere precisi ed eficienti come l'esator dee tase, a sì anca romantici che metà basta. Xe ora de farse l'ultimo weekend al mare...
Capricorno: La stimana la sarà divisa a metà. In tei primi giorni la sfiga xe la vostra mijore amiga. Lassè perdare, ghe xe ninte da fare, piutosto zughè al solitario in tel pc o cazzegiè su feisbuk. Dopo, parò, va tuto ben e in tel weekend a farì faville tra i lensoi. Avisè i morosi ca se tegna liberi o zerchè qualche dun ca ghin profita
Gemelli: Benon, sopratutto in te e robe amorose. Sia ca sì fidansà o sposà, sia ca sì single, a sì fighi come Johnny Depp (ca xe beo anca coa pansetta). Saria anca ora de prenderse cura de se stessi: 'ndare in Spa xe mia na vergogna e ve ofre anca un drink (analcolico però)
Bilancia: Deme reta, sareve da qualche parte parchè sia in tel lavoro ca con chi ca ve sta atorno a tirè fora el peso de voialtri. La roba bea xe ca gavì anca un fassino magnetico quindi ve convien sararve sù in te un posto pien de gente ca no ve conosse, così ve presentè.
Acquario: La novità xe ca sì lucidi e ciò va ben par el sgobo. E ve convien impegnarve lì, parchè con amici, morosi, parenti a xe un disastro e anca con quea persona ca ve piase si drio sbajar tuto. Meditè
Cancro: Ahi ahi ahi, a sì smemorelli ca metà basta: ste tenti ca scomisia la scoa e ris-ciè de desmetegrave el bocia là o, se sì zovani, de sbajar autobus. A sì anca un fiatin melanconici: no ste preocuparve, xe el cambio de stagion.
Scorpione: Basta baruffare sempre, se co certa gente non dasì d'acordo, anca coi parenti eh, xe inutie insitare. Voltè pagina. De bon ghe xe ca ve contrè in tel business: le stee dise ca riva schei.
Pesci: Ah bon ciò. Sarà na stimana bona par i schei, ca ve riva grassie ala vostra abilità in te i investimenti. I problemini de salude xe drio risolverese e da zobia va ben tuto tuto tuto: bon