Oroscopo vicentino della settimana
Co tute ste tribolasiòn del Vicenza, lo strologo ga tirà zò pì santi che stee in cielo... vedemo cosa ca le dise
Ariete: Ghe sarà tante bee oportunità ma dovì star tenti a queo ca fasì: rifletè bene prima de agire e anca de parlare. Infati, no tuti i vini coa eticheta bea i xe boni... Ocio ai scassabae, che sta stimana ne gavarì un pocheti intorno
Leone: A sì in asedo e continuè a rompere i maroni a chi ca ve sta intorno. No va mia ben, una paroleta bea ogni tanto la ghe sta. A sì nervosi ca metà basta, zerchè te tasere el pì posibile e badè pitosto de star tenti a non perdare anca la criniera: a sì un fiatin svampii.
Sagittario: A gavarì la tendensa de esere un fiatin massa spendaccioni e mi ve consijo prudensa, anca se ghe ze i saldi. Gavarì anca qualche rotura de bae al sgobo ma le vostre idee i convenserà tuti. Se no ne gavì, sempre mejo tasere.
Toro: Molto ben sopratuto in tel lavoro o lo studio. I primi giorni dela stimana qualchedun ve rompe le bae con un fià de critiche: zerchè de contentarli, che i ga rasòn. Dopo le robe le se sblocca e ve rivarà na risposta ca xeri drio spetare da un toco.
Vergine: Metive bei eleganti parchè sta stimana rivarà qualchedun ca poe darve na bea man in tel lavoro. Na tratativa la va vanti ben e saria el caso de farse rispetare n'atimin de pì: ghe xe qualchedun massa invadente
Capricorno: Sta stimana niente ve poe fermare: a sì astuti, inteligenti, convinti e parfin bei. Andarì dacordo con tuti, parfin in fameja, e rivarà bee notissie da persone ca non sentì da tempo. No sì peoci: fasiveo un regaleto. CIN!
Gemelli: L'inisio el saria anca bon e zerchè de ciaparghe dentro parchè dopo le robe le 'ndarà sempre pegio. In tel sgobo no riusì a concentrarve e ancha coi morosi xe na lagna continua. Tignì duro fino al weekend
Bilancia: I sarà giorni bei sia in tel sgobo sia coi morosi, i amici e la fameja. Godive la prima parte dela stimana parchè el weekend sarà mia beissimo: ghe sarà da barufare e ancha qualche scenata de gelosia la xe drio l'angolo.
Acquario: I sarà giorni de lavoro e de spostamenti, pì o meno visini. Le robe le va ben con coleghi e amici e no podì lamentarve de come ca andarà le robe. In tel fine stimana podarisi trovare n'antagonista: ocio ca nol sia massa grosso...
Cancro: Sta stimana armeve de santa pasiensa, ve ne servirà asà e dopo 'ncora. Ocio a chi gavì intorno parchè gavarì bisogno de na bea man par risolvere zerte robette. L'amor va benissimo e coi morosi fasì s-ciantisi e i single i cucca
Scorpione: Ghe sarà n'atimo da sbaterse par convicere qualchedun che la vostra idea la xe bona e dovarisi farghea. La sarà na stimana bona, sopratuto par quel che riguarda el lavoro e la sodisfasion personae. Qualche barufeta parchè si un po' massa sboroni.
Pesci: Sta stimana tuti ve farà i cmplimenti, sia in tel sgobo che i amici del biliardo che i morosi. Gavio oferto da bere? Ocio però ai spetegoloni: qualchedun ve parla da drio. Xe sfigà lù (o ela): portè pasiensa