Oroscopo della settimana
Xe la stimana dela festa dela Liberasion ma delo strologo no ce liberemo mia tanto fasilmente
Ariete: Gavì el garbin sta stimana. Mejo starve distante o ze cornade. Zerchè de rilasarve parchè xe el vostro anno e no ve lo tole nisun, ve agitè par ninte. Magari moeghea de farve el cafè coreto ale 7 col vostro amigo imbriagon.
Leone: Barufanti! Anca se no podì lamentarve de gnente si drio tirar su casin con tuti, sopratuto ex ("Ma non dovevamo vederci più?" el cantava el risso) e parenti. ma quei xe serpenti e ceste. Segneve: se dovì parlar con qualchedun, i giorni boni xe marti, mercore e domenega, quando no sbranarè nisun.
Sagittario: Marriavergine ca difisili ca sì! Vardè ca non si mia dei fotomodei, ah! Voialtri zerchè la "persona perfetta" ma no ste desmentegarve de vardarve anca al specio! Mejo ca andè farvi un gireto par conto vostro, ca el tempo xe beo
Toro: Vanti col santo, ca la procesion se ingruma! Xe inutie ca ste lì lamentarve se non xe ndà tuto come volevi voialtri. Ceste e spetè un fiatin che le robe ndarà ben. Na roba ca podì fare se ciamare quel poaretto ca gavì molà e desso si pentii. Proveghe, mai se sà.
Vergine: Alora, come sempre in tel lavoro si bavissimi e gavi sodisfasion. Queo che va manco ben xe l'amor, in paricolare pare le done (e no ste far le soite batude), che le xe massa freddine. Dai ca quando sì vecie non ve vol pì nisun!
Capricorno: Finalmente xe la vostra stimana, sempre ca non ve imusonè par tuto, come fè de solito. Le responsabilità xe il vostro pan e sì bravi ed eficenti come Di Gennaro a centrocampo. Par quei puchi de voilatri che ga qualchedun ca li soporta, steghe drio, ca a si sta massa in asedo fin desso.
Gemelli: Ciapeghe dentro parchè el periodo bon el finisse con la primavera. No che poi vada mal, ma pì lenti. Quindi, come dise quei seri, sarè le robe in sospeso. Se si drio far tira e mola con qualchedun, basta, se ga stufà anca el gato. Anca parchè podaria eserghe qualche robeta bona par pasar qualche oreta in compagnia
Bilancia: Hm, a sì nervosi e rabià come quei che vive visin al Victory ma no xe la vostra natura e non sì contenti. L'unica roba xe far qualcosa ca ve piase, magari no sempre star tacà su al bancon del bar
Acquario: No ghe semo proprio. Se ghavì na casa o amici a Laghi ndè sù che almanco ve godì el panorama e ve rilasè. Ne gavì bisogno. E va ti a savere... magari tra no spriss e na graspa podaria rivare anca l'ammor...
Cancro: Se ve lassè 'ndare, sarà na stimana ca manco a San Valentin. Gavì i oci a cuoricin e se vede. Comprè provviste e sareve sù col moroso, ca xe el momento giusto.
Scorpione: Qualche acciacco ve mete ansia, sopratuto se no ghe ze nisun che ve iuta, ma no ste trarve zò che le robe le 'ndarà mejo pì vanti. Se domandè a qualchedun, però, ste tenti che nol sia del Leon o ris-ciè de finir mae...
Pesci: Scuseme la batuda, ma si drio fogarve in te un bicier de acqua. E sì ca xera un periodo bon ma voialtri gavì fato de tuto par incasinar su e robe. Zerchè de star chieti