Oroscopo della settimana dal 3 al 9 luglio
Che ghe sia el sole o che tambara, el strologo nol manca mai de leser le stee
Ariete: a sì un poco masa nervosetti. Xe caldo par tuti, no solo che par voialtri! Trovè da discutere su ogni roba e la gente xe drio schivarve come quei ca vende acendini in spiagia. Eco, a proposito de mare, secondo mi queo che ve serve xe proprio un poco de vacansa... Par fortuna mercore e zobia gavarì no sc-ianti de fortuna e diventerè meno insoportabili: i risultai li vedarè.
Leone: Anca sta stimana a sì i re delo sodiaco. Gavì talmente tante robe impantà sù ca no savì da che parte scominsiare ma ve asicuro che qualsiasi cosa la andarà ben. Anca in tea camera da letto ruggì da saver vostro. Ocio a non svejar i vicini...
Sagittario: Se riusì a star chieti e no tirè su rogne inutili, podaria anca eser na stimana bona. A sì ciacoette ca metà basta ma gavì i vostri fan ca i ve apressa: contenti luri... Sia al sgobo che coe persone a sì brilanti. Ben.
Toro: Le stele le saria anca bele ma parchè ve ostinè a barufare con chi ve sta visin? Fasighe qualche cocola in più a queo sifgà ca ve soporta. Pal resto la va bastansa ben, se no fusse ca ve toca fadigar...
Vergine: Ghe xe qualchedun ca no ve soporta e cerca in tuti i modi de meterve in dificoltà: no ste badarghe e se proprio dovì, ofrighe un giro e usè le vostre armi diplomatiche, no lo sc-iopo. Questa xe la vostra maniera de risolver le robe e savì farlo ben. Del resto el mona xe sto qua: sta stimana a sì generosi e qualchedun no vol ciaparghe dentro... cassi sui!
Capricorno: No xe decisamente el periodo vostro periodo. A barufè anca co voi stesi e va stasì parfin sui cojoni: ste chieti ca xe mejo. Se no ve riesse proprio de tasere, ndè farve un gireto in montagna e provè a ciparvela co qualche orso... Al manco lassù xe fresco e no copè nisun.
Gemelli: Decisamente questa parte de l'anno la ve va ben. A sì anca inamorà e sì drio viver un bel periodo. Ve rinovo el consijo de darve da fare a sarar sù le question ca gavì verte: nei prosimi mesi tocarà un poca de sfiga anca a voialtri e se mejo ca ghe ciapè dentro desso.
Bilancia: Marria santa, xe mejo starve ala larga. A sì nervosi come ca fasì parfin luce e el caldo no ve da na man: ocio a no barufare co le persone sbaja se no ve riva anca un stramuson. Ste chieti e andè de spriss (quando xe fresco, ocio)
Acquario: La bona notissia xe ca le robe se risolverà, quea brutta xe ca non xe mia 'desso. Portè pasiensa e cerchè de no far dani in giro, ocio sopratuto a quando ca versì la boca...
Cancro: Va ben ca si generosi, ma no ste esagerare: pensè anca ae robe vostre che el momento xe bon. A sì felici e spensierati e de saute a stasì deciamente ben, quindi deve da fare!
Scorpione: Sto giro ve porto bee notisie. Gavì qualche question impantà su in te lavoro, ma sta stimana dovarì riuscire a risolvere. Anca in banca le robe le va benin e saria el momento giusto de organisar le ferie, anca parchè, stranamente, no sì drio barufar con morosi e fameja.
Pesci: Vardeve intorno parchè ghe xe qualchedun tra i vostri amici ca ve sarà presioso par risolvere un problem ca gavì da tempo. Saria anca el momento giusto par pensar a dove ca andarè in ferie: xe ora de far la borsa e girare i tacchi, ansi, le pinne...