Oroscopo della settimana dal 22 al 28 majo
Con tuto queo ca ghe xera da fare in giro sto fine stimana, no se sa quando lo strologo, ca xe no sbrindolon, gabia trovà el tempo de vardar le stee, ma tant'è...
"Marso tinse, april dipinse, majo fa bee le done, giugno fa le brute carogne"
Chi sa cosa che i voeva dire i nostri veci con sto proverbio qua... Speremo ca le stee le sia pì ciare!
Ariete: Deve na lucidada ai corni che xe ora. A sì pronti par nove sfide ma dovì darve na smossa, quindi... zò dala branda (ma ocio al gradin)
Leone: In effetti ciapare do euro l'ora no xe mia na bela roba. Desso basta far i timidi e i pigri e deve na mossa. Xe un periodo bon par trovare qualcosa de mejo, se no anca star casa, a sto punto, xe mia sbajà.
Sagittario: Le acque chete le distruse i ponti. Voialtri sì un po' cusita: boni, boni rivè sempre dove ca volì. Vanti cusì, ca la procesion se ingruma.
Toro: A sì drio perdare qualche colpo e sta stimana podarisi anca far qualche bruta figura galante. Lassè perdare: st'istà tornarè in forma ma par desso mejo ca ve sentè so a bevare un goto
Vergine: Ve speta na stimana cusì cusì ma no ste preocuparve che da metà giugno riva el periodo vostro. Ste sereni e andrà tuto ben.
Capricorno: Scùp dela stimana, anca voialtri gavì un cuore. Spetè l'istà par far s-ciantisi ma zà desso scominsiè a viver un bel periodo. Ocio al zobia e al venare, ca sarì nervosetti, ma magari xe colpa de la retrocesion...
Gemelli: Ghe xe i ultimi s-ciopi del bel periodo ca gavì vudo, quindi deve na mossa a tor qualche decision importante. Da agosto a sarì pì imbatonii de mi dopo do giorni de festòn.
Bilancia: Se volì rivolusionar la vostra vita, xe il momento giusto. Se sì biondi feve mori, se ve piase l'Aperol pasè al Campari ma, me racomando, biancorossi sempre.
Acquario: Gavì n'atimo esagerà co lo sciopping e desso sì drio pentirve, anca parchè no xe ca se comprè un vestio de do taje pì picolo poi diventè magri. N'atimo de pasiensa e basta coi tramesini.
Cancro: A sì in forma come na strassa. Gavì tirà la careta fin desso e no sì mia el pendolin Laverone. Par de pì desso a sì anca sensibili (sì, sì, gavi leto ben) e ve metì piansere anca vardando le prevision del tempo. Metive in leto e alseve tra na stimana, ca xe mejo.
Scorpione: Aaaah, finalmente podarì tojerve qualche saseto dae scarpe. Libereve da ciò che ve angustia, basta ca no copè qualdun, e 'ndè vanti co le vostre robe. Ve digo ca sarà na bea istà.
Pesci: Xe na stimana un po' balenga, ma voialtri sarì in grado de far filar tuto lissio fin domenega quando sarì voialtri a pescar ben. Tegnive in forma.